FUTBOLCHI BO’LMAGANIMDA…?

   Agar bugungi kunda futbol bo’lmaganida nima bo’lardi? Mantiqsiz savol shunday emasmi? Umuman olganda hayotini futbolsiz tasavvur qila olmaydigan insonlar yetarlicha topiladi. Ko’pchilik futbolchilarga futbolchi bo’lmaganinggizda qaysi kasbni tanlardingiz degan savol berilishi tabiiy. Ana shu savollarga berilgan javoblardan kelib chiqqan holda ushbu maqolani tayyorlashga qaror qildim. Endi tasavvur qiling ayrim futbolchilarimiz futbolchi bo’lmaganida, ularni qaysi sohada uchratib qolardingiz.

   O’zbekistonning va Osiyoning ikki karra eng yaxshi futbolchisi bo’lgan Server Jeparov ehtimol gimnastikani tanlashi ham mumkin edi. Agar futbol bo’lmaganida u hozir gimnastika zallarida bolalarga dars berib yurgan bo’larmidi. U gimnastika bilan yaxshi shug’ullanganligiga shubha qiluvchilar bo’lsa, Server golni qanday nishonlashini ko’z oldilariga keltirsalar bas, shubhalar darrov tarqaydi. Futbolchilar maktabda yaxshi o’qimaganlar degan teoremaga qarshi chiquvchilar yo’q emas. Masalan «Lokomotiv» yarim himoyachisi Sherzod Sharipov bugungi kunda fan sohasini tanlagan bo’lishi ham mumkin edi. Ya’ni u maktabda yaxshi baholarga o’qigan va shu sababli ham obro’li institutda o’qib, ilm-fan sohasini tanlab ushbu sohada ham o’z o’rniga ega bo’lgan bo’larmidi. Sherzod Raimjonov ham a’lo baholarga o’qib, maktabni oltin medalga bitirgan. U 2 ta diplomga ega. FarDUning jismoniy tarbiya hamda iqtisodiyot fakultetlarini tamomlagan. Ehtimol uni bugun futbol maydonida emas, qaysidir bankning hodimi sifatida ko’rarmidik. Shuningdek «Paxtakor» futbolchisi Vladimir Kozak ham bank sohasida faoliyat yuritayotgan bo’lishi mumkin edi. «Metallurg» klubi darvozaboni Ma’mur Ikromov futbolni tanlamaganida, tarjimon bo’lardi. Chunki u maktabda ingliz tilini a’lo baholarga o’qigan. Ehtimol u bugungi kunda horijlik sayyohlarga tarjimonlik qilib yurgan bo’larmidi.

    «Nasaf» yarim himoyachisi Mirzakamol Kamolov balki bugun huqushunos bo’lishi ham mumkin edi.. Chunki u tarixga judayam qiziqqan. U futbol bo’lmaganida advokat yoki prokuror bo’lishi ahtimoli katta edi. «Mash’al» jamoasining uzoq yillik sardori Gabit Sapargaliev ham Mirzakamol singari huqushunos bo’lishi mumkin edi. Sababi Gabitning otasi o’g’lini futbolni emas, aynan yuqoridagi sohani tanlashini juda xohlagan. «Neftchi» jamoasi hujumchisi Nosir Otaqo’ziev xarbiy sohani tanlab, general yoki komandir bo’lib ishlayotgan bo’lardi. Agarki futbolchi bo’lmaganida. Ha, uni harbiy formada tasavvur qilish ko’pchilik uchun qiziq tuyulsa kerak.  

   Agar yo’lda taksi to’xtatib, unga o’tirsangiz haydovchi sifatida Hikmat Hoshimovni ham ko’rishingiz mumkin edi. Afsuski bunday bo’lishiga futbol to’sqinlik qilgan. Hikmatning otasi ko’p yillar mobaynida shu kasbning orqasidan oila tebratgan. Shu bois uning bolaligidan shu kasbga qiziqishi baland bo’lgan. Umuman olganda avtomobil boshqarishni jonu dili deb hisoblaydi. Mabodo u yo’lda qoidani buzsa, DAN xodimlarining qo’liga tushib qolsa, ana shu yashil formada bugungi kunda  Bahrom Haydarov yoki «Buxoro» klubi forvardi Bahriddin Vahobovlar bo’lishlari ehtimoli ham katta edi. Zero ular futbolni tanlamaganlarida aynan mana shu sohani tanlagan bo’lishardi. 

  O’zbekiston chempionatida ikki marotaba to’purarlikni qo’lga kiritgan Umid Isoqov va «Lokomotiv»da akasi bilan ajoyib tandemni hosil qilgan Farxod Tojievlarni tadbirkor sifatida ko’rishimiz ham mumkin edi. Ular oldi-sotdi ishlarida ancha faol ishlashlarini so’nggi paytlarda tez-tezdan jamoalarini o’zgartirganliklaridan ham bilib olish mumkin. Bekzod Abdumo’minov futbolni tanlamaganida, musavvir bo’lardi. Chunki bolaligidan rasm chizishga juda qiziqqan. Haligacha bo’sh vaqti bo’lib qolsa, tabiat manzaralarini chizadi. Balki u bugun mashg’ulotlar maydonida emas, Parijda rasmlari ko’rgazmasini o’tkazishga tayyorlanayotgan bo’larmidi. Yana kim biladi deysiz. Balki biroz oshirib yuborgandirmiz. Biroq Bekzod mashhur rassom bo’lishi mumkin edi baribir. Agar siz tishingiz og’rib, stamatologga borib qolsangiz u yerda Aziz Haydarovga ko’zingiz tushib qolsa ajablanmagan bo’lardingiz. Sababi u tish doktori bo’lishni ham orzu qilgan. Moboda Aziz faoliyatini yakunlagach, o’ziga klinika ochib olar.

   Isroil Ergashev yoshligidan traktorga qiziqqan. Shu bois futbolni tanlamaganida ehtimol ota kasbi traktorchilikni tanlashi mumkin edi. «Navbahor» jamoasi himoyachisi Abdumajid Toirov futbolni tanlamaganida baribir sport sohasida qolgan bo’lardi. U jismonity tarbiya fani o’qituvchisi yoki murabbiy bo’lishi aniq edi. Shuning uchun ham faoilyatini yakunlaganidan so’ng u murabbiylik sohasini tanlashiga shubha qilmasak ham bo’laveradi. «Nasaf» forvardi Kenja To’raev ham sportchi bo’lib qolardi. Uni kurash gilamida ko’rishib qolsak ajablanmasdik. Har holda Kenjani ko’rganlar uni kurashchi ekanligiga aslo shubha qilmagan bo’lishardi.

   Xullas mana aziz futbolimiz ixlosmandlari ayrim futbolchilarimiz futbolni tanlamagnlarida qaysi kasb egasi bo’lishlari haqida sizga ozgina bo’lsada ma’lumot bera olgan bo’lsak, bundan juda xursandmiz.

Furqat Yusupov.

furqat_1112@mail.ru