«YOSH JURNALISTLAR KLUBI» FAOLIYATINI DAVOM ETTIRADI…

  Universitetiga kirgan paytim, jurnalistika ta’lim yo’nalishi talabalarini yig’ib, birorta klub ochishni rejalashtirib yurgan edim. 1-kurs paytim bu ishni amalga oshirishim sal qiyinroq edi. Biroq 2-kursda, ya’ni 2013-yilning 23-yanvar kuni nihoyat o’z maqsadimga erishdim. Nurjanova Hurliman va Seytnazarova Guljahanlar bilan birgalikda «Yosh jurnalistlar klubi»ga asos soldik. Bu borada biz «Kelajak ovozi» YoTM va «Kamolot» YIH bilan hamkorlik qildik. Mazkur yilning may oyida esa klubimizning 1-mavsumini yakunladik. Shu paytgacha biz 12-ta semiminar-trening o’tkazishga muvaffaq bo’ldik. Bu albatta biz uchun yaxshi natija. Har bir seminar mobaynida klub a’zolarini zeriktirib qo’ymaslikka va treningdan nimadir olishlari uchun harakat qildik. O’ylaymanki bu harakatimiz o’z samarasini albatta beradi. Klub a’zolarining bir qator maqolalari «Qaraqalpaq Universiteti», «Qaraqalpaqstan jaslari» kabi gazetalarda va megaline.uz internet saytlarida e’lon qilindi.  Klubimiz universitet miqyosida ham asta sekin tanila boshladi. Ayrim ustozlarimiz biz bilan hamkorlik qilishga rozi bo’lishdi. «Nukus FM» radiosi boshlovchisi Miyrigul Esimbetova bilan ham uchrashuv bo'lib o'tdi va u radiojurnalistika haqida trening o'tib berdi. Shuningdek biz  klub a’zolari uchun «Talabalik – oltin davr» nomli maqolalar tanlovini e’lon qildik. G’oliblarga esa diplom va sovg’alarni topshirdik. Klubimizga 30 nafar talaba a’zo sanaladi. Ular safida nafaqat jurnalistika yo’nalishida, balki qoraqalpoq, o’zbek filologiyasi, tarix, iqtisodiyot, geografiya va kimyo fakultetlarida tahsil olayotgan talabalar ham bor. «Kelajak ovozi» YoTM Qoraqalpog’iston Respublikasi bo’limi tomonidan 1-mavsum yakunida barcha ishtirokchilarga va biz trenerlarga sertifikat topshirildi. 2013/2014-o’quv yilida ham klubimiz o’z faoliyatini davom ettirish niyatida. 2-mavsum uchun esa bizda rejalar bisyor. Nasib qilsa klubimizni 2 ta yo’nalish bo’yicha davom ettirmoqchimiz. 1–yo’nalishda tele va radiojurnalistika bo’yicha, 2-yo’nalishda internet va bosma jurnalistika bo’yicha ish olib bormoqchimiz. Shuningdek klubimiz safini kengaytirish niyatimiz ham bor. Ya’ni biz faqat universitet talabalari bilan cheklanib qolmoqchi emasmiz. Biz boshqa oliy o’quv yurtlari talabalari, Akademik litsey va kasb hunar kolleji, hamda maktablarda ta’lim olayotgan iqtidorli, jurnalistika sohasiga qiziquvchan yoshlarni ham o’z safimizga qo’shish niyatidamiz. To’g’ri bu oson emas, lekin uddalasa bo’ladigan ish. Shunday ekan, yangi mavsumda uchrashguncha deb qolamiz. Salomat bo’ling...

Yusupov Furqat

Manba: furqatyusupov.blogspot.com