пятница, 1 ноября 2013 г.

JAHON FUTBOLIDAGI ENG BUYUKLAR.


   Ushbu maqolam, oldinroq «Interfutbol» gazetasida chop etilgan edi. Shunday bolsa ham uni oz blogimga joylashtiryapman.

Eng buyuk «qo’shiqchi».
   Braziliyalik maestro Pelening Braziliyada bir nechta albomlari chiqqan, u ko’proq samba yo’nalishida ijod qilgan.


Eng buyuk «piyonista».
   Sobiq inglis futbolchisi Pol Gaskoyn O’yinlar arafasida nasha chekib, 9 stakancha (!) brendi ichganicha maydonga tushganini ochiq tan olgan. Boz ustiga shedevr gollarida mastlikning ulushi borligini ham alohida ta’kidlagan. Ba’zida esa o’yinlardan oldin o’ziga kelish uchun ikki shisha viski ichgan. Jamoasi mag’lub bo’lganida esa, bir o’tirishda 13-15 shisha pivo ichgan.

Eng buyuk «soch turmagi».
   Braziliyalik Ronaldoning JCH-2002 finalida qo’ygan popuchkasi juda mashhur bo’lib ketgandi. Aynan uning ana shu, o’ziga xos soch turmagi Angliyaning «The Sun»  nashri tomonidan futbol tarixidagi eng yaxshisi deb topilgan.

Eng buyuk «yig’loqi».
   Portugaliyalik buyuk «afsungar» Krishtianu Ronaldu maydonda tez-tez ko’z yoshi to’kib turadi. Uning ayniqsa Yevro-2004 finalidagi mag’lubiyatdan so’ng va CHL-2008da g’alaba qozonganidan so’ng to’kkan ko’z yoshlari ko’pchilikning esidan chiqib ulgurmagan bo’lsa kerak.

Eng buyuk «aldoqchi».
   1986 yilda Meksikada bolib otgan JCHda argentinalik Diego Maradona qoli bilan inglizlar darvozasini ishgol qilib, hakamning qulogiga «lagmon» osgandi.

Eng buyuk «bashoratchi».
   Futbol qiroli Pele shunaqangi bashorat qiladiki, endi asti qo’yavering. Uning bashoratlaridan birontasi to’g’ri chiqishi, bu Lixteynshteyn terma jamoasining Jahon chempionatiga chiqqani bilan barobardir.
   Aslida buyuk «bashoratchi» deb JCH-2010da 8 ta o’yinning natijasini to’g’ri topgan germaniyalik sakkizoyoq Paulni e’tirof etish mumkin. Uni hatto Vangaga tenglashtirishdi.

Eng buyuk «simulyant».
   Italiyalik «ofsaydda tugilgan» Filippo Inzagi simulyatsiya ishlatishda, hatto arab «aktyorlari»ga ham dars berib qoyishga qodir.

Eng buyuk «qariyalar uyi».
   Italiyaning «Milan» klubida ba’zi mavsumlarda yoshi 30 dan oshgan 10 dan ortiq futbolchilar to’p surishardi. Hozirgi kunga kelib esa vaziyat butkul o’zgardi.

Eng buyuk «nafaqahor»
   Kamerunlik Roje Milla hattoki 43 yoshida ham JChda to’p surib, gol ham urgan. Shundan keyingina nafaqaga chiqqan.

Eng buyuk «kashanda».
   Jahon chempioni Attilio Ferraris «Italiya futbolining buyuk kashandasi» laqabini olgan. U kuniga 40 dona papirusni tutatgan. Buning oqibatida, 1947-yilning 8-mayida 43 yoshda dunyodan erta ko’z yumgan.

Eng buyuk «shoir».
   Yaponiya termasi bilan JCH-2010da murabbiy sifatida ishtirok etgan Takeshi Okada futboldan dam olib, qishloqda yashab u yerda she’r yozib ijod qilgan. Hattoki 2 ta she’riy kitobi ham chop etilgan.

Eng buyuk «yozuvchi».
   Germaniyalik sobiq posbon Oliver Kanning qalamiga mansub 3 ta kitob chop etilgan.

Eng buyuk «bosh».
   Fransuz afsonasi Zayniddin Zidanning JCH-2006 finalida italiyalik Marko Mteratsiga qo’ygan “boshi” jahon futboli durdonasidir.

Eng buyuk «papa».
   Polshadagi Vadovisa shahrining futbol jamoasida to’p surgan Ionn Pavell II keyinchalik Rim papasi bo’lgan.

Eng buyuk «tarjimon».
   Barchangizga ma’lumki «Portu», «Real», «Inter» jamoalarining sobiq, «Chelsi»ning ayni paytdagi ustozi Joze Mourino faoliyatini tarjimon sifatida boshlagan.

Eng buyuk «ota».
  Futbol afsonasi, 2 karra jahon chempioni braziliyalik Garrinchaning zurriyoti sifatida 14 nafar bola rasman tan olingan. Ularning dastlabki 11 tasi qiz bo’lgan.

Eng buyuk «aktyor».
   «Manchester Yunayted» afsonalaridan biri Erik Kontona butsasini qoziqqa ilgach, o’zini bir qator filmlarda sinab ko’rdi. Uning o’z hayotiga bag’ishlangan «Erikka qarab» nomli filmdagi ro’li kinotanqidchilarda ham iliq taasurot qoldirgan. Shundan keyin 1999 yilda rejissyor Sheykxar Kapur suratga olgan «Elizabet» va «Le Deuxime Souffle» seriallari uning tajriba maktabi bo’lgan. Shuningdek u Parij teatrlarining birida «Face au Paradis» nomli spektaklda ham ro’l ijro etgan.

Eng buyuk «sotqin».
   Luish Figu «Barselona»dan «Real»ga o’tishi uni sotqinlarning buyugiga aylantirdi. Bir safar «El-klassiko» bahslarida kataloniyalik muhlis Luishning yuziga Portugaliya bayrog’ini va cho’chqa boshini otib ketishi ham uni muxlislar kechira olmasligidan dalolat. 

   Albatta futbolda «buyuk»lar juda ham ko’p. Maqoladagi buyuklar esa mening shaxsiy qarashlarim natijasidir. Har kimning o’z shaxsiy fikri bor. Balki, sizning ham har bir yo’nalishda o’ziga xos buyuk futbolchilaringiz border.

Furqat Yusupov
Manba: furqatyusupov.blogspot.com

1 комментарий: